Gold Rate Today: सोन्यामध्ये गुंतवणूक करणे हा सध्या अनेक लोकांच्या चर्चेचा विषय बनला आहे, कारण गेल्या काही महिन्यांपासून सोन्याच्या किमतीमध्ये मोठी वाढ झाली आहे. १० ग्रॅम सोन्याचा भाव जवळपास एक लाख रुपयांपर्यंत पोहोचला आहे. मात्र, आगामी काळात सोन्याच्या दरात मोठी घसरण होण्याची शक्यता काही तज्ज्ञांनी वर्तवली आहे.
किमती खाली येण्याची संभाव्य कारणे कोणते?
काही तज्ज्ञांच्या अंदाजानुसार, सोन्याच्या दरात जवळपास ३८ टक्क्यांपर्यंत घसरण होऊ शकते. या घसरणीमागे अनेक प्रमुख कारणे आहेत:
- उत्पादन वाढ: सोन्याच्या खाणकामात मोठी वाढ झाली आहे. ऑस्ट्रेलियासारख्या देशांनी सोन्याचे उत्पादन वाढवले आहे, ज्यामुळे सोन्याचा जागतिक साठा ९ टक्क्यांनी वाढला आहे.
- सेंट्रल बँकांकडून कमी मागणी: वर्ल्ड गोल्ड काऊन्सिलच्या सर्वेक्षणानुसार, जगातील ७१% सेंट्रल बँका पुढील वर्षी सोन्याची खरेदी कमी करण्याचा किंवा आहे तेवढा साठा कायम ठेवण्याचा विचार करत आहेत.
- जागतिक अस्थिरता कमी होणे: गेल्या काही महिन्यांत जागतिक अस्थिरता, महागाई आणि व्यापारयुद्ध यांसारख्या कारणांमुळे गुंतवणूकदारांनी सुरक्षित गुंतवणूक म्हणून सोन्याकडे अधिक लक्ष दिले होते. आता ही अस्थिरता कमी झाल्यास सोन्याची मागणी घटू शकते.
जागतिक आणि भारतीय बाजारातील अंदाज
मॉर्निंगस्टारमधील तज्ज्ञांनी वर्तवलेल्या अंदाजानुसार, सोन्याचा भाव ५५,००० रुपयांपर्यंत खाली येऊ शकतो. सध्या जागतिक बाजारात सोन्याचा भाव $३,१०० प्रति औंस आहे, ज्यामध्ये ४० टक्क्यांनी घट होण्याची शक्यता आहे.
विविध संस्थांचे भिन्न अंदाज काय?
जरी काही तज्ज्ञांनी सोन्याच्या किमतीत घसरण होईल असे म्हटले असले, तरी बँक ऑफ अमेरिका आणि गोल्डमॅन सॅक्स सारख्या मोठ्या वित्तीय संस्थांचे अंदाज वेगळे आहेत. त्यांच्या मते, पुढील काही वर्षांत सोन्याचा दर अनुक्रमे $३,५०० आणि $३,३०० प्रति औंसपर्यंत पोहोचू शकतो. त्यामुळे, गुंतवणूक करताना या दोन्ही प्रकारच्या अंदाजांचा विचार करणे महत्त्वाचे आहे.
तुम्ही सोन्यामध्ये गुंतवणूक करण्याचा विचार करत असाल, तर या सर्व बाबींचा अभ्यास करूनच निर्णय घ्या.
